National Geographic: Ohri, ndër 6 liqenet sekrete të Europës

Zbuloni liqenet më të qeta dhe më pak të njohura të Evropës, ku peizazhet malore, noti në natyrë dhe udhëtimi janë pa turma pushuesish. Kështu e nis artikullin për liqenet sekrete të Evropës, 6 destinacione pa turma, media prestigjioze “National Geographic”, ku në mesin e këtyre atraksioneve turistike rendit edhe Liqenin e Ohrit, përfshirë pjesën e Shqipërisë dhe të Maqedonisë së Veriut.

Media ndërkombëtare shkruan se ky atraksion turistik, që mendohet të jetë liqeni më i vjetër i Evropës, duket i përjetshëm dhe unik për shumë arsye. I shtrirë përgjatë kufirit mes Shqipërisë dhe Maqedonisë së Veriut, Liqeni i Ohrit ka qenë këtu për rreth 1.5 milion vjet, ndërsa vendbanimet përgjatë brigjeve të tij datojnë mijëra vjet më parë.

Qendra kryesore, qyteti i Ohrit, është një labirint rrugicash me kalldrëm, shtëpish osmane dhe pikash vrojtimi mbi majat e kishave, ku ditët kalohen duke u endur midis faltoreve bizantine, dyqaneve me perla dhe tavernave buzë ujit.

Ky liqen është i pastër, ushqehet nga dhjetëra burime natyrore dhe është i rrethuar nga male që pasqyrojnë shkëlqimin e tyre në perëndim të diellit. Një nga vendet më të bukura është Kisha e Shën Gjonit në Kaneo e shekullit të 13-të, e vendosur në mënyrë unike mbi vijën e ujit në një shkëmb, shkruhet në artikullin e “National Geographic”.

Udhëtimet me varkë janë një pikë kulmore në Liqenin e Ohrit, veçanërisht në jug drejt manastirit të Shën Naumit, ku pallonjtë enden nëpër territor dhe pelegrinët presin në radhë për të vizituar varrin e shenjtorit.

Media prestigjioze “National Geographic” sugjeron se për një udhëtim më të qetë në Liqenin e Ohrit, merrni një kajak ose një padleboard dhe ndiqni vijën bregdetare në veri drejt plazheve të qeta dhe gjireve të rrethuara me pishat e mrekullueshme.