Pianistët e rinj nga rajoni bëhen bashkë në Korçë

Në Galerinë e Artit “Guri Madhi” në Korçë u zhvillua gjatë fundjavës koncerti pianistik FQINJËT, me pjesëmarrjen e artistëve të rinj nga Mali i Zi, Kosova, Maqedonia e Veriut dhe Shqipëria.
Në koncert u luajtën pjesë nga autorë të njohur evropianë si Franz Liszt, Johannes Brahms, Sergei Rachmaninoff, Ludovico Einaudi etj., por dhe nga autorë të rajonit si Tonin Harapi, Rauf Dhomi, Borjan Canev dhe Aleksandar Perunović.
Koncerti u organizua nga ABC Tirana Club, me synimin për të forcuar urat e komunikimit dhe kooperimit, sidomos mes të rinjve. “FQINJËT nxit dhe promovon bashkëpunimin rajonal, si një premisë e sigurtë dhe e qëndrueshme për procesin e integrimit evropian, që përbën synim strategjik për vendet e rajonit tone”, thotë Johan Muka, drejtues i projektit.
Artdashësit korçarë vlerësuan intepretimet e Iva Ivanoviç (Mali i Zi), Adea Halili (Kosovë), Marija Stojanova (Maqedoni e Veriut), Ami Muka dhe Maria Pandazi (Shqipëri). Udhëheqëse artistike ishte Vjollca Stamo.
Disa ditë më parë, në kuadër të këtij projekti, në qytetin e Korçës u hap ekspozita e arteve pamore “Mbrojtja e të drejtave të fëmijëve dhe të rinjve”. Aty paraqitën punimet e tyre 30 krijues të rinj, nxënës nga shkollat e Bashkisë Korçë, të cilët sollën përmes gjuhës artistike problematika të ndryshme në fushën e mbrojtjes së të drejtave të fëmijëve dhe të rinjve.