Ministri i Brendshëm Ervin Hoxha ka përzgjedhur kandidatin që do t’i dërgojë Këshillit të Ministrave për Drejtor të Përgjithshëm të Policisë së Shtetit.

Nga 5 emrat e kualifikuar në listën finale, Ilir Proda është ai i përzgjedhuri nga ministri i Brendshëm.

Kjo kandidaturë do të duhet të miratohet nga Këshilli i Ministrave.

Ilir Proda mban aktualisht postin e Drejtorit të Policisë së Elbasanit.

Në foto: Ilir Proda

Emrat e tjerë në listë ishin Altin Mena, Ardian Çipa, Neritan Nallbati dhe Skënder Hita.

Policia e Shtetit drejtohet përkohësisht nga Sokol Bizhga, pas dorëheqjes së Muhamet Rrumbullakut.

Karriera e Ilir Prodës

Ilir Proda ka një karrierë rreth 19-vjeçare në radhët e uniformave blu. Ilir Proda kreu studimet në Akademinë e Sigurisë në periudhën 2002-2005. Ai e nisi punën fillimisht në Komisariatin Nr.3 në Tiranë, po kështu vijoi edhe në Komisariatin Nr.4 Më pas ka shërbyer në Drejtorinë e Përgjithshme të Policisë së Shtetit si shef kundër krimeve ndaj jetës dhe lirisë.

Në Tetor të vitit 2013 mori për herë të parë detyrën e shefit të komisariatit Nr.2 deri në Dhjetor 2014. Më pas, nga kjo periudhë deri në vitin 2016 mbajti detyrën e shefit të komisariatit të Bulqizës.

Nga Shkurt 2016-Maj 2017 ka qenë në Sektorin për Hetimin e Narkotikëve në Drejtorinë e Përgjithshme të Policisë së Shtetit.

Në Korrik 2019-Tetor 2021 ka qenë zv/drejtor për Hetimin e Krimit në Policinë e Korçës.

Nga Tetori 2021 – Mars 2024 ka qenë zv/Drejtor në Policinë e Elbasanit.