Italianët ikin pa paguar në Berat, Meloni-ambasadorit: Paguaje dhe jep një deklaratë

Gjatë vizitës së saj në Shqipëri, Giorgia Meloni mësoi për një incident që kishte ndodhur me disa turistë italian në Berat. Ata hëngrën në një restorant dhe u larguan pa paguar.

Vetëm kryeministri Rama bëri me dije për La Stampa se e kishte vënë në dijeni homologen e tij, ndërsa kjo e fundit kishte porositur menjëherë ambasadorin të paguante faturën dhe të mbante një deklaratë sepse Italia s’mund të humbiste respektin për të tilla situata.

“Kur i tregova Giorgias për këtë ajo qeshi. Të gjithë qeshën dhe më pas i tha ambasadorit ‘shko paguaj faturën për ata budallenj të lutëm dhe bëj një deklaratë. Italia nuk mund ta humbasë respektin kështu’,” – u shpreh Rama.

Kryeministrja e Italisë mbërriti tre ditë më parë (14 gusht 2023) në Vlorë me një traget linje. Ajo ndërpreu pushimet e saj në Pulia, dhe u nis për në Shqipëri, duke iu përgjigjur kështu ftesës së Ramës, i cili pak ditë më parë tha për mediat italiane se e ka ftuar kryeministren italiane që të pushojë në Shqipëri.