Trump pas takimit me Petron: Nuk jemi miq, por u kuptuam

Takimi i parë mes Presidentit të Shteteve të Bashkuara, Donald Trump, dhe homologut të tij kolumbian, Gustavo Petro, u zhvillua në Zyrën Ovale dhe u vlerësua pozitivisht nga të dy liderët.

“Po, u takuam dhe punuam mbi disa çështje. Nuk ishim miqtë më të mirë më parë, por u kuptuam shumë mirë. Takimi ishte shumë i mirë”, tha Trump.

Pas takimit, Presidenti i Kolumbisë, Gustavo Petro, e cilësoi bisedën si pozitive dhe të ndërtuar mbi vlera të përbashkëta, pavarësisht dallimeve politike dhe historike mes dy vendeve.

“Ne mund të jemi shumë të ndryshëm, por ajo që na bashkon është liria. Ky nuk është një rrugëtim sanksionesh, por një rrugëtim i lirisë”, u shpreh Petro.

Petro tha se Presidenti Trump i kishte shprehur mendimin se sanksionet nuk janë një zgjidhje racionale në këtë rast dhe se palët ranë dakord të kërkojnë hapësira bashkëpunimi pa presion politik.

Më vonë, nga Venezuela erdhën sinjale për kontakte të drejtpërdrejta mes Uashingtonit dhe Karakasit. Presidentja në detyrë e Venezuelës, Delcy Rodríguez, njoftoi se kishte zhvilluar biseda telefonike me Presidentin amerikan Donald Trump dhe Sekretarin e Shtetit, Marco Rubio.

Rodríguez theksoi nevojën për një agjendë konstruktive dhe rikthimin e komunikimit diplomatik.

Ndërkohë që situata politike në Venezuelë paraqitet delikate, mijëra mbështetës të qeverisë marshuan nëpër Karakas, duke kërkuar lirimin e Nicolas Maduros dhe gruas së tij, Cilia Flores, një muaj pas arrestimit të tij nga forcat amerikane.