Takimi SHBA-Iran në Stamboll, do marrë pjesë edhe Kushner me ministrat rajonalë

Ministrat e Jashtëm nga Turqia, Katari dhe Egjipti, si dhe homologët nga Arabia Saudite, Omani dhe Pakistani, mund të marrin pjesë në bisedimet e mundshme Iran-SHBA në Stamboll. Të paktën kështu kanë deklaruar zyrtarë rajonalë për Washington Post.

Një zyrtar rajonal, duke folur në kushte anonimiteti, tha se dhëndri i Presidentit Donald Trump, Jared Kushner, do të marrë pjesë gjithashtu së bashku me të dërguarin special amerikan Steve Witkoff nëse takimi zhvillohet.

Një këshilltar i lartë i presidentit iranian tha të martën se ndjekja e paqes nuk do të thotë dorëzim, pasi presidenti Masoud Pezeshkian urdhëroi ministrin e jashtëm të rifillojë bisedimet me Shtetet e Bashkuara.

“Jo çdo paqe është dorëzim,” shkroi Mohammad Jafar Ghaempanah, zëvendës ekzekutiv i presidentit, në X. “Asnjë luftë nuk është e mirë, dhe jo çdo paqe është dorëzim.”

Më herët, Pezeshkian tha në një postim në X se kishte udhëzuar ministrin e jashtëm Abbas Araghchi të rifillojë bisedimet me SHBA-të në përgjigje të një propozimi nga presidenti Donald Trump dhe kërkesave nga “qeveri miqësore”.

Raportet thonë se Araghchi dhe i dërguari special amerikan Steve Witkoff pritet të takohen në Stamboll të premten.

Presidenti Trump të enjten dha një mesazh tipikisht të paqartë për Iranin, duke kombinuar fjalët për forcë ushtarake dërrmuese me sinjale se mund të favorizojë një marrëveshje të negociuar.

“Nuk mund t’ju them çfarë do të bëj tani,” tha Trump për gazetarët në Zyrën Ovale kur u pyet për Iranin. “Ne kemi një forcë të jashtëzakonshme që po shkon atje, ashtu siç bëmë në Venezuelë, edhe më e madhe.” Megjithatë, ai theksoi se administrata tashmë është në kontakt me Teheranin.
“Tani po flasim me ta. Po flasim me Iranin,” tha ai. “Nëse mund të arrijmë diçka, do të ishte e shkëlqyer. Nëse jo, gjëra të këqija ndoshta do të ndodhin.”