Presidenti Duka merr pjesë në Mbrëmjen Gala të Federatës Hungareze

Federata Hungareze e Futbollit festoi mbrëmjen e së hënës 125-vjetorin e themelimit.

Në Mbrëmjen Gala, të organizuar nga MLSZ, mori pjesë edhe Presidenti i Federatës së Futbollit, Armand Duka. Mes personaliteteve të shumta të futbollit europian dhe botëror, të pranishëm ishin gjithashtu Presidenti i UEFA-s, Aleksander Ceferin, dhe Presidenti i FIFA-s, Gianni Infantino.

Përmes një postimi në rrjetet sociale, Presidenti Duka e uroi edhe një herë Federatën Hungareze të Futbollit, duke theksuar rolin e saj të veçantë në zhvillimin e futbollit.

“Që prej vitit 1901, një shembull i përkushtimit dhe shërbimit ndaj lojës së futbollit. Gëzuar 125-vjetorin e Federatës Hungareze të Futbollit, një nga federatat më të vjetra në botë!”, shkruan Presidenti Duka.