Parlamenti i jep dritën jeshile marrëveshjes SHBA-BE. Tani nisin negociatat

Parlamenti Evropian i ka dhënë dritën jeshile marrëveshjes SHBA-BE për tarifat. E “ngrirë” në janar pas kërcënimeve të presidentit Trump ndaj Groenlandës, marrëveshja e nënshkruar vitin e kaluar në Turnberry të Skocisë është miratuar me 417 vota pro, 154 kundër dhe 71 abstenime.

Megjithatë janë shtuar disa garanci nga raportuesit: në veçanti ajo e kërkuar nga Bernd Lange (S&D), sipas së cilës marrëveshja nuk do të hyjë në fuqi nëse Shtetet e Bashkuara nuk respektojnë të gjitha dispozitat.

Deri në momentin e fundit, krahu kundërshtar në Parlament u përpoq të shtynte ratifikimin. Në veçanti, Martin Schirdewan i grupit të së Majtës paraqiti një mocion.

“Kështu siç është, nuk është një marrëveshje, është një shantazh”, deklaroi ai, por propozimi u rrëzua. Kundër ishin edhe të Gjelbrit. “Tarifat e Trump-it janë të paligjshme. BE-ja duhet të përdorë mjete të tjera si instrumentin kundër detyrimit”, tha eurodeputetja e të Gjelbërve, Anna Cavazzini, citon La Repubblica.

Megjithatë, votimi i sotëm nuk shënon fundin e procesit: përfaqësuesit e Parlamentit dhe të qeverive të BE-së tani do të negociojnë tekstet përfundimtare përpara votimit final të miratimit nga salla, i parashikuar jo më herët se prilli ose maji.

Afate të shkurtra

Afatet tani janë shumë të shkurtra. Presionet nga Shtetet e Bashkuara për ratifikimin e marrëveshjes kanë qenë shumë të forta. Edhe këtë mëngjes ambasadori amerikan në BE, Andrew Puzder, rikujtoi në X se “që nga gushti i kaluar, kur SHBA-të dhe BE-ja publikuan marrëveshjen kuadër për tregtinë, SHBA-të kanë respektuar angazhimet e saj tarifore. BE-ja ende nuk e ka bërë këtë. Ka ardhur koha që BE-ja të ndërmarrë hapin tjetër drejt përmbushjes së angazhimeve të saj tarifore”.

Në ndërhyrjen para votimit, komisioneri për Ekonominë Valdis Dombrovskis i dha garanci Parlamentit lidhur me kërkesat ndaj Shteteve të Bashkuara.

“Do të vazhdojmë përpjekjet tona për të ruajtur marrëdhënie konstruktive dhe për të shmangur paqëndrueshmërinë. Megjithatë, nuk do të mbyllim sytë ndaj rreziqeve që mund të prekin interesat tona. Jemi plotësisht të vendosur t’i mbrojmë këto interesa tregtare.”, tha Dombrovskis.