Masivizohen më tej protestat në Iran/ Përleshje mes policisë dhe qytetarëve, vriten dy efektivë, mbi 2 mijë persona të arrestuar

08/01/2026

Të mërkurën në mbrëmje, përleshje të dhunshme midis protestuesve antiqeveritarë dhe forcave të sigurisë u përhapën në disa qytete të Iranit, ndërsa një valë trazirash e shkaktuar nga kriza ekonomike e vendit vazhdoi për të 11-tën ditë. Agjencia gjysmëzyrtare e lajmeve Fars e Iranit, e cila është afër Gardës Revolucionare, tha se dy policë u qëlluan dhe u vranë nga individë të armatosur në qytetin jugperëndimor të Lordeganit.

Videot e postuara në mediat sociale treguan një përballje të tensionuar midis protestuesve dhe forcave të sigurisë, me zhurmën e të shtënave në sfond. Në pamjet filmike nga disa zona të tjera, forcat e sigurisë duket se qëllojnë me armë dhe gaz lotsjellës drejt turmave të protestuesve, disa prej të cilëve hodhën gurë drejt policisë.

Protestat deri më tani janë përhapur në 111 qytete dhe qyteza në të 31 provincat e Iranit. Të paktën 34 protestues dhe katër forca sigurie janë vrarë gjatë trazirave, ndërsa 2,200 protestues janë arrestuar.

Protestat filluan më 28 dhjetor, kur tregtarët dhe pronarët e dyqaneve dolën në rrugët e kryeqytetit, Teheran, për të shprehur zemërimin e tyre për një rënie tjetër të ndjeshme të vlerës së monedhës iraniane, rialit, kundrejt dollarit amerikan, ndërsa inflacioni ka shënuar rritje të ndjeshme. Studentët e universitetit iu bashkuan shpejt protestave dhe ato filluan të përhapeshin në qytete të tjera, me turma që dëgjoheshin shpesh duke brohoritur slogane kundër Udhëheqësit Suprem të vendit, Ajatollah Ali Khamenei.

Written by: Sasha Ndreka