Kuvendi i Shqipërisë do të organizojë të enjten zhvillimin e homazheve në nderim të ish-deputetit Gerti Bogdani.

Kuvendi njofton se ato do të zhvillohen nga ora 10:00 deri në orën 12:00, në sallën e seancave plenare. Për rrjedhojë seanca parlamentare që ishte programuar të niste të enjten në orën 10:00 është shtyrë në orën 17:00. Ndërkohë, Partia Demokratike njofton se në nder të Gert Bogdanit ka shpallur të enjten ditë zie dhe për rrjedhojë ka pezulluar të gjitha aktivitetet partiake në gjithë vendin.
Politika shqiptare sot është në zi. Ish-deputeti i Partisë Demokratike Gerti Bogdani ndërroi jetë në moshën 44-vjeçare.

Bogdani humbi jetën si pasojë e një ataku kardiak teksa ka qenë duke konsumuar kafe në një lokal të njohuar në qendër të kryeqytetit. Ai u ndje keq dhe u dërgua në spital. Fatkeqësisht, aty mbërriti pa shenja jete.

Ndërkohë, politika ka shprehur ngushëllimet për ndarjen nga jeta të Gerti Bogdanit.