Kriza për buxhetin, qeveria franceze i mbijeton votave të mosbesimit

Qeveria franceze i mbijetoi dy votave të mosbesimit në parlament këtë të premte, lidhur me vendimin e saj për të kaluar pjesën e të ardhurave të buxhetit 2026 pa i dhënë Asamblesë Kombëtare fjalën e fundit.

Siç shkruan Reuters, një total prej 269 ligjvënësish votuan pro mocionit të mosbesimit të paraqitur nga e majta radikale France Unbowed së bashku me të Gjelbrit dhe Komunistët, ndërkohë që duheshin 288 vota për të rrëzuar qeverinë. Më pak mbështetje mori një mocion i dytë i mosbesimit, i paraqitur nga e djathta ekstreme.

Qeveria e presidentit Emmanuel Macron po detyrohet të anashkalojë parlamentin pasi muaj të tërë negociatash nuk arritën të prodhonin një projektligj financiar për uljen e deficitit që do të kalonte në dhomën e ulët, ku asnjë parti nuk ka shumicë funksionale.

Le Pen thotë se votuesit do të ndëshkojnë mbështetësit e qeverisë

Në kërkim të një buxheti, Macron humbi dy qeveri dhe pa Francën të zhytur në trazira të rralla që nga krijimi i Republikës së Pestë në vitin 1958.

Me Francën që mbështetet në një buxhet të përkohshëm të vitit të kaluar për të mbijetuar, Lecornu bëri lëshime në minutat e fundit këtë muaj për të siguruar marrëveshjen e Socialistëve që të mos e rrëzonin qeverinë nëse përdorte kompetencat speciale kushtetuese.

Udhëheqësja e së djathtës ekstreme, Marine Le Pen, tha se kundërshtarët e qeverisë që mbështetën Lecornu-n në votën e besimit do të paguajnë çmimin në zgjedhjet e ardhshme, përfshirë zgjedhjet lokale që mbahen në mars dhe presidencialet që do të zhvillohen në vitin 2027.

“Mos mendoni se askush nuk ju sheh. Populli francez ju sheh, dhe do t’ju bëjë të paguani në kutinë e votimit,” tha Le Pen para ligjvënësve. “Jo vetëm për gjakderdhjen buxhetore që po u shkaktoni, por edhe për procesin poshtërues që po përdorni.”

Lecornu tha se deficiti buxhetor nuk do të kalojë 5% të PBB-së, më poshtë se 5.4% i vitit 2025, por ende shumë mbi kufirin 3% të Bashkimit Evropian.