Josh Gruenbaum, fytyra e re amerikane në negociatat me Rusinë

Mes negociatorëve amerikanë të dërguar në Kremlin për të diskutuar përfundimin e konfliktit mes Rusisë dhe Ukrainës, ka dalë një emër i panjohur për shumëkënd: Josh Gruenbaum.

Prania e tij u raportua nga agjencia ruse Tass dhe do të tregonte kalimin e negociatave në një fazë të lidhur me përcaktimin e marrëdhënieve ekonomike mes Rusisë dhe Shteteve të Bashkuara.

La Repubblica shkruan se 40-vjeçari, i diplomuar në juridik dhe ekonomi në Universitetin e New York-ut, është pjesë e trupës së avokatëve të shtetit të New York-ut dhe gëzon respekt të madh nga i dërguari i Shtëpisë së Bardhë, Steve Witkoff.

Administrata Trump e ka përfshirë ndoshta për aftësitë e tij negociuese dhe përvojën në menaxhimin e ristrukturimeve të korporatave, bashkimeve dhe blerjeve të mëdha.

Së fundmi, emri i tij është përfshirë në Bordin e Paqes, organi i krijuar nga Donald Trump për të nisur një plan rikonstruksioni dhe stabilizimi në Gaza. Por që vjeshtën e kaluar, avokati kishte marrë pjesë së bashku me Witkoff në një takim në Miami, Florida, me të dërguarin e Kremlinit, Kirill Dmitriev.

Aktualisht, Gruenbaum është drejtor i Federal Acquisition Service, një degë e Administratës së Shërbimeve të Përgjithshme të SHBA-ve, agjencia federale përgjegjëse për tenderët dhe furnizimet qeveritare. Para se të hynte në administratën Trump, ky avokat i ri ka punuar në sektorin e private equity me kompani të njohura si gjiganti i investimeve KKR & Co dhe firma e konsulencës strategjike Moelis & Company.