Azilkërkuesit, Holanda me sytë nga modeli italo-shqiptar

Në takimin me presidenten e Komisionit Evropian, Ursula von der Leyen, kryeministri i ri holandez Jetten ka diskutuar idetë për strukturat që mund të ngrihen jashtë territorit të shteteve anëtare të BE-së, të destinuara për të përpunuar në mënyrë më të shpejtë kërkesat e azilkërkuesve.

Sipas mediave vendase, kryeministri Rob Jetten ka shprehur interes për të eksploruar modele migracioni të ngjashme me marrëveshjen mes Italisë dhe Shqipërisë, si një zgjidhje e mundshme për sistemin holandez të përballimit të kërkesave për azil dhe më gjerë për atë evropian.

Jetten ka zhvilluar diskutime me disa homologë, përfshirë kryeministren italiane Giorgia Meloni. Holanda dhe Italia kanë punuar vitet e fundit së bashku në udhëheqje të një grupi shtetesh evropiane për të gjetur zgjidhje inovative në këtë fushë.