FIFA po mendon të japë dritën jeshile për ekipet ruse që të rikthehen të luajnë

FIFA po lëviz për të hequr ndalimin e Rusisë nga futbolli ndërkombëtar, pas lëvizjes së UEFA-s për të zbutur qëndrimin e saj për të njëjtën çështje.

Vendimi ka të ngjarë të merret si pjesë e një takimi të Këshillit të FIFA-s, i cili mund t’i japë dritën jeshile skuadrave ruse për të luajtur në Kupat e Botës U-17 nëse kualifikohen.

FIFA dhe Unioni Rus i Futbollit nuk iu përgjigjën kërkesës së Reuters për koment mbi këtë çështje.

UEFA ka vendosur, pas pushtimit rust ë Ukrainës në shkurt 2022, që të gjitha ekipet ruse, kombëtare dhe klube, do të ndalohen të marrin pjesë në eventet e ndryshme futbollistike.

Megjithatë, javën e kaluar, organi qeverisës i futbollit europian vendosi se “fëmijët nuk duhet të ndëshkohen për veprime për të cilat të rriturit janë përgjegjës” dhe se ekipet ruse U-17 do të ripranohen në garat e UEFA-s gjatë këtij sezoni.

Shoqata e Futbollit të Ukrainës i kërkoi UEFA-s të rishqyrtojë vendimin e saj dhe tha se nuk do të marrë pjesë në turne që përfshijë ekipe ruse.

Anglia, Norvegjia, Suedia dhe Danimarka thanë gjithashtu se ekipet e tyre të të rinjve nuk do të luajnë kudnër Rusisë pavarësisht vendimit të UEFA-s.