Zyrtare/ Flick rinovon me Barcelonën, detajet e kontratës

Trajneri Hansi Flick ka nënshkruar zyrtarisht zgjatjen e kontratës me Barcelonën deri në vitin 2028, me opsion për një sezon tjetër.

Marrëveshja u firmos në zyrat e klubit, në prani të drejtuesve kryesorë, duke përfshirë Rafa Yuste dhe Joan Laporta. Megjithëse skuadrës i ka mbetur edhe një ndeshje kampionati në transfertë ndaj Valencias për të mbyllur plotësisht sezonin aktual, tekniku gjerman ka nisur punën për planifikimin e edicionit të ardhshëm.

Bisedimet mes palëve për të shtrirë bashkëpunimin tej afatit fillestar të vitit 2027 kishin nisur prej kohësh, por trajneri preferoi të priste përmbushjen e objektivave sportivë përpara se të hidhte firmën mbi dokumente.

Gjatë negociatave, klubi katalanas arriti të përfshijë një klauzolë për një vit tjetër opsional pas sezonit 2027-2028.

Fillimisht, Flick ishte treguar i tërhequr ndaj kësaj pike, për shkak të bindjes së tij se kontratat afatgjata nuk janë gjithmonë praktike për rolin e një trajneri, megjithatë palët gjetën gjuhën e përbashkët për të mbyllur marrëveshjen.