Yjet mblidhen për Ukrainën

Numri dy i botës Rafael Nadal dhe yje të tjerë të tenisit dhuruan spektakël në “Rod Laver Arena”, në një event për të mbledhur të ardhura për Ukrainën.

Përveç 22 herë fituesit të Grand Slamit, në fushë kishte edhe emra të tjerë si Andy Murray, Fransis Tiafo dhe Koko Gauf, që argëtuan turmën.

Në fillim pati duele me njëri-tjetrin, e më pas edhe sfida dyshe.

Sipas organizatorëve, të gjitha të ardhurat nga eventi “Tennis Plays for Peace” i dhurohen UNICEF Australia dhe Global Giving, të cilët po mbështesin nismat humanitare në Ukrainë.

Vëmendjen më të madhe të publikut të Melburn e mori Nadal, i cili ua shpërbleu me talentin e tij gjatë lojës.

Tenistet ukrainase Dajana Jastremska dhe Marta Kostik u pritën në fushë me duartrokitje të mëdha.

Por emocionues ishte edhe momenti kur në fushë u futën 98-vjeçari Leonid Stanis-lavski dhe 99-vjeçari Henry Young, që pavarësisht moshës e testuan veten me emra të njohur të tenisit.