UEFA zgjedh arbitrin e finales së Champions-it, ka gjykuar dy herë Arsenalin këtë sezon

UEFA ka zyrtarizuar arbitrat e finales së Champions League mes PSG-së dhe Arsenalit, që do të luhet më 30 maj në “Puskas Arena” të Budapestit.

Gjermani Daniel Siebert do të jetë arbitri kryesor i sfidës më të rëndësishme të sezonit europian për klube. 42-vjeçari, arbitër ndërkombëtar që nga viti 2015, do të drejtojë për herë të parë një finale të kompeticioneve të klubeve të UEFA-s.

Sistemi VAR do të drejtohet nga Bastian Dankert, ndërsa në ekipin teknik do të jetë edhe spanjolli Carlos Del Cerro Grande. Po ashtu, Guadalupe Porras Ayuso është caktuar si asistente rezervë për finalen.

Siebert ka arbitruar edhe më parë Arsenalin këtë sezon, në çerekfinale ndaj Sportingut dhe në gjysmëfinalen e kthimit kundër Atletico Madridit.