Trump akuzon Venezuelën për vjedhjen e naftës amerikane, SHBA vendos bllokadë ndaj vendit latin

17/12/2025

Presidenti i SHBA-së, Donald Trump, i ka vendosur një bllokadë nafte Venezuelës, duke e ridrejtuar një armatë të madhe detare amerikane në Karaibe nga operacionet kundër të dyshuarve si “narkoterroristë” në kapjen e “cisternave të sanksionuara” që hyjnë dhe dalin nga vendi.

Trump njoftoi masën në një postim në Truth Social të martën, duke e përshkruar atë si “një bllokadë totale dhe të plotë të të gjitha cisternave të naftës të sanksionuara që hyjnë dhe dalin nga Venezuela”.

“Venezuela është e rrethuar plotësisht nga armata më e madhe e mbledhur ndonjëherë në historinë e Amerikës së Jugut. Ajo vetëm sa do të bëhet më e madhe dhe tronditja për ta do të jetë si asgjë që nuk kanë parë më parë – derisa të kthejnë në Shtetet e Bashkuara të Amerikës të gjithë naftën, tokën dhe asetet e tjera që na i vodhën më parë”, shtoi Trump.

Njoftimi vjen pas sekuestrimit të fundit nga SHBA-të të një anijeje cisternë të madhe nafte në brigjet e Venezuelës, një veprim i rrallë ushtarak i drejtpërdrejtë kundër eksporteve të naftës së Venezuelës.

Trump e ka quajtur gjithashtu qeverinë e Presidentit venezuelan Nicolas Maduro një “Organizatë Terroriste të Huaj”, duke pretenduar se fitimet e saj nga nafta ushqejnë rrjetet kriminale dhe dëmtojnë sigurinë rajonale.

Uashingtoni “nuk do të lejojë që një regjim armiqësor të na marrë naftën, tokën apo ndonjë pasuri tjetër, të cilat duhet t’i kthehen të gjitha Shteteve të Bashkuara, MENJËHERË”, shtoi presidenti i SHBA-së.

Ky veprim vjen në mes të një përforcimi të forcave detare amerikane në Karaibe dhe kërcënimeve të Trump për të kryer sulme kundër “narkoterroristëve” të dyshuar në tokën venezueliane. Që nga shtatori, ushtria amerikane ka vrarë më shumë se 80 persona në sulme ndaj anijeve të dyshuara të karteleve, të cilat Trump pretendoi se po përdoreshin nga qeveria venezueliane për të “përmbytur” Amerikën me narkotikë.

Written by: Sasha Ndreka