Të pajisura me mjete moderne dhe robotë, çminuesit e Koresë së Veriut vendosen në rajonin rus të Kurskut

14/11/2025

Ministria Ruse e Mbrojtjes njoftoi sot se njësi çminuese nga Koreja e Veriut janë vendosur në rajonin e Kurskut, zonë që nga gushti i vitit 2024 deri në pranverën e vitit 2025 ishte pjesërisht nën kontrollin e forcave ukrainase. Sipas gazetës zyrtare të ministrisë, Krasnaya Zvezda, vendosja e çminuesve koreano-veriorë erdhi pas “kontributit të rëndësishëm” që njësitë speciale të Ushtrisë Popullore të Koresë së Veriut dhanë gjatë operacioneve ushtarake në territor. “Meqenëse njësitë speciale dhanë një kontribut të rëndësishëm në mposhtjen e armikut, tani çminuesit e Koresë së Veriut kanë ardhur në Kursk”, thuhet në raportim.

Forcat çminuese, të trajnuara në qendrat ruse të inxhinierisë ushtarake, janë pajisur me mjete moderne dhe robotë për të pastruar zonat ku ende ndodhen “qindra” mina, predha dhe pajisje shpërthyese të mbetura pas tërheqjes së forcave ukrainase. Numri i saktë i çminuesve nuk është bërë publik. Krasnaya Zvezda ka publikuar edhe foto nga operacionet e tyre në terren.

Rusia kishte njoftuar në fund të qershorit se Pheniani do të dërgonte mijëra çminues dhe teknikë ushtarakë për të ndihmuar në rindërtimin e rajonit të dëmtuar të Kurskut. Ndërkohë, në fillim të nëntorit, Koreja e Jugut, duke iu referuar agjencive të inteligjencës, raportoi se rreth 5,000 personel ushtarak të Koresë së Veriut kishin mbërritur në Rusi që nga shtatori.

Koreja e Veriut është përfshirë drejtpërdrejt në konfliktin Rusi–Ukrainë, duke i siguruar Moskës trupa dhe mbështetje logjistike për operacionet në Kursk. Bashkëpunimi mes dy vendeve është forcuar sidomos pas nënshkrimit të marrëveshjes së mbrojtjes së përbashkët në vitin 2024, gjatë vizitës së presidentit Vladimir Putin në Phenian.

Written by: Sasha Ndreka