SHBA: Ukraina të na kthejë 500 mld USD borxh

21/02/2025

Uashingtoni këmbëngul që Volodymir Zelensky të ulet në tryezën e bisedimeve dhe të pranojë kërkesat për të shlyer borxhet që i ka Shteteve të Bashkuara për financimin e deritanishëm të luftës me Rusinë dhe një marrëveshje për fundin e saj.

“Presidenti Trump është shumë i acaruar me presidentin Zelensky, për faktin që nuk ka pranuar të ulet në bisedime për atë çka i kemi ofruar. Këtë duhet ta bëjë shpejt ”, tha Mike Waltz Këshilltari për Sigurinë Kombëtare.

Uashingtoni kërkon që Ukraina ta furnizojë me minerale të rralla, të nevojshme kryesisht për industrinë e teknologjisë së lartë, për të kompensuar ndihmën prej 500 miliardë dollarësh që Shtetet e Bashkuara i dhanë gjatë administratës Biden për të përballuar luftën. Ndërsa presidenti ukrainas Volodymyr Zelensky, pas takimit me të dërguarin amerikan, ish-gjeneralin Kith Kellog tha se interesat ekonomike dhe ato të sigurisë duhet të ecin krah për krah, duke shprehur gatishmërinë për të dialoguar me administratën Trump, pavarësisht retorikës së ashpër të ditëve të fundit me shefin e Shtëpisë së Bardhë.

Sekretari i Përgjithshëm i NATO-s Mark Rutte kërkoi që Uashingtoni t’i japë Kievit garanci për sigurinë pas arritjes së marrëveshjes së paqes. Ndërkaq, Trump do të presë javën e ardhshme në Uashington, Emanuel Macronin dhe Kir Starmerin.

Written by: Sasha Ndreka