Samoel Rrasa, nënkampion bote për të rinj

Samoel Rrasa u shpall nënkampion bote për të rinj në peshëngritje, në kampionatin që po mbahet në Egjipt. 18-vjeçari mori medaljen e argjendit në stilin e shkëputjes për peshën 65 kilogramë. Në garën që u zhvillua mbrëmjen e së dielës, Rrasa ngriti 134 kilogramë në provën e tij më të mirë në shkëputje, ndërsa në shtytje rezultati më i mirë ishte 156 kilogramë, që e renditi të pestin në këtë stil dhe të katërtin në dygarësh.

Një paraqitje shumë e mirë për Samoel Rrasën, i cili ka marrë edhe më herët medalje në aktivitete ndërkombëtare. Kjo arritje vjen disa ditë pas medaljeve të marra nga Briken Calja në Europianin për të rritur në Gjeorgji: ar në shtytje dhe argjend në dygarësh. Gara tjetër për Shqipërinë do të jetë të martën me Enkileda Carjan në peshën 69 kilogramë.