Ronaldo shënon në Champions-in Aziatik

Pas 140 golave në Europë, Cristiano Ronaldo shënon edhe në Champions League aziatike.

Portugezi ishte vendimtar për Al Nasër në fitoren me përmbysje 3-1 ndaj Istiklolit. Skuadra saudite e mbylli pjesën e parë në disavantazh të një goli, teksa në të dytën e frymëzuar edhe nga Ronaldo kaloi gjithçka në favor të vet. 38-vjeçari barazoi llogaritë pas shumë tentativash. Portugezi realizoi golin e shtatë radhazi me Al Nasër, duke e udhëhequr kështu drejt raundit tjetër të kompeticionit.

Barazimi ia bëri më të vështirë skuadrës nga Taxhikistani për të marrë të paktën një pikë, pasi superioriteti i Al Nasër ishte i dukshëm, duke gjetur edhe golat e fitores.

Vendimtar, Taliska me dopietën e golave, për të ruajtur kështu edhe pathyeshmërinë e Al Nasër në grupin kualifikues të Champions League. Persepolis i Iranit është në vendin e dytë pas Al Nasër, që theu rivalët për të koleksionuar fitoren e parë sezonale. Dhjetë fituesit e grupeve dhe gjashtë vendet e dyta më të mira do të kalojnë në fazën tjetër të kompeticionit.