Një vit sot nga pushtimi rus në Ukrainë, Zelensky: 2023-shi do jetë fitorja jonë

Një vit pasi Rusia nisi pushtimin e saj në Ukrainë, Kievi po forcon masat e sigurisë në të gjithë vendin dhe po përgatitet për sulme të mundshme.

Në vijën e frontit, Ukraina tha se situata në drejtim të qytetit lindor të Bakhmut mbetet “më e vështira” pasi forcat ruse po përpiqen ta rrethojnë atë.

Presidenti i Ukrainës, Volodymyr Zelensky sot thotë se përkundër të gjitha vështirësive që ukrainasit kanë përjetuar gjatë 12 muajve të fundit të luftës, viti 2023 do të jetë viti i fitores ndaj Rusisë.

“Më 24 shkurt, miliona prej nesh bënë një zgjedhje. Jo një flamur të bardhë, por ai kaltër e verdhë. Jo duke ikur, por duke u përballur. Duke rezistuar dhe luftuar. Ishte një vit dhimbjeje, pikëllimi, besimi dhe bashkimi. Dhe këtë vit, ne mbetëm të pathyeshëm. Ne e dimë se viti 2023 do të jetë viti i fitores sonë”.