Monitorimi i racizmit i kërkon FIFA-s largimin e zyrtarit të VAR-it për gjestin si “supremaci e bardhë”

Monitori i diskriminimit në Kupën e Botës i FIFA-s ka kërkuar largimin e një zyrtari të sistemit VAR, pas një gjesti me dorë që është interpretuar nga disa organizata si simbol i lidhur me supremacinë e bardhë.

Incidenti ndodhi gjatë ndeshjes hapëse të Gjermanisë kundër Curaçaos të dielën, kur transmetimi zyrtar televiziv tregoi ekipin e VAR-it para fillimit të lojës. Zyrtari australian Shaun Evans u pa duke bërë një shenjë “OK” me dorën e djathtë përpara trupit.

Në vitin 2019, simboli “OK” (gishti i madh dhe treguesi të bashkuar në formë rrethi) u përfshi nga Liga Anti-Shpifje me qendër në New York në listën e simboleve të urrejtjes, për shkak të përdorimit të tij nga grupe ekstremiste.

Reagimet e organizatave monitoruese

Rrjeti Fare, partner afatgjatë i FIFA-s dhe UEFA-s për monitorimin e racizmit dhe diskriminimit në stadiume, deklaroi se gjesti i bërë nga zyrtari “ngjason qartë me simbolin e përmbysur ‘OK’, i përdorur në disa qarqe të ekstremit të djathtë si simbol i ‘fuqisë së bardhë’”.

Sipas këtij rrjeti, “ky zyrtar nuk duhet të ketë më asnjë rol në këtë Botëror”, duke e cilësuar gjestin edhe si “neo-nazist”.

Paqartësi mbi qëllimin e gjestit

Nuk është e qartë nëse Shaun Evans po bënte një gjest politik apo thjesht një shaka të njohur si “circle game”, një lojë fëmijësh ku dikush bën shenjën “OK” dhe përpiqet të godasë shpatullën e personit që e shikon.

Ky gjest është përvetësuar më herët nga grupe ekstremiste në internet, duke u bërë subjekt debatesh mbi përdorimin e tij në kontekste të ndryshme.

Sipas ekspertëve të Ligës Anti-Shpifje, interpretimi i simbolit varet nga konteksti, pasi ai mund të jetë edhe i pafajshëm në përdorim të zakonshëm, por edhe i lidhur me mesazhe urrejtjeje në raste të caktuara.

Shaun Evans është një nga 30 zyrtarët e VAR-it të përzgjedhur nga FIFA për Kupën e Botës që zhvillohet në SHBA, Kanada dhe Meksikë.

Organizata Fare ka vënë në pikëpyetje edhe mënyrën e prezantimit të zyrtarëve të VAR-it në transmetimet televizive, duke ngritur shqetësime për ndikimin e tyre në perceptimin publik të turneut.