Ministri i Brendshëm i Kosovës paralajmëron, Sveçla: Kërcënimet e Serbisë mbeten problem serioz!

Ministri i Brendshëm i Kosovës, Xhelal Sveçla ka pritur në takim Shefen e Operacioneve të Divizionit për Operacione të NATO-s, Ariella Viehe. Përmes një postimi në Facebook, Sveçla theksoi se me Viehen ka biseduar për situatën aktuale të sigurisë në Kosovë, veçanërisht në veriun e vendit.

“Sulmet e njëpasnjëshme viteve të fundit ndaj institucioneve tona dhe zyrtarëve tanë në veriun e Kosovës si dhe sulmi terrorist i 24 shtatorit ishin çështjet e rëndësishme për të cilat biseduam me znj. Viehe, po ashtu edhe për bashkëpunimin dhe bashkëveprimin e mirë e të vazhdueshëm mes KFOR dhe Policisë së Kosovës”, u shpreh Sveçla.

“Kërcënimet e vazhdueshme të Serbisë dhe ambiciet e saj territoriale për Kosovën vazhdojnë të përbëjnë problem serioz për Kosovën por edhe rajonin”, nënvizoi ai.