Lideri kinez telefonatë me Putin, thirrje “fuqive të mëdha” të ulin tensionet me Iranin

Udhëheqësi kinez, Xi Jinping, u ka bërë thirrje “fuqive të mëdha” që të ndihmojnë në uljen e tensioneve në konfliktin me Iranin gjatë një bisede telefonike me homologun rus, Vladimir Putin, një mesazh i tërthortë drejtuar presidentit Trump, sipas CNN, ndërsa ky i fundit po shqyrton përfshirjen e SHBA-së.

Të dy liderët dënuan veprimet e Izraelit kundër Iranit gjatë bisedës, ndërsa Kremlini bëri të ditur se Putin ofroi sërish ndërmjetësim.

Xi theksoi se duhet një armëpushim i menjëhershëm, duke u bërë thirrje të dyja palëve, por “veçanërisht” Izraelit, të ndalin armiqësitë.

“Palët në konflikt, veçanërisht Izraeli, duhet të ndalojnë sulmet sa më shpejt për të parandaluar përshkallëzimin e mëtejshëm të situatës dhe për të shmangur me vendosmëri përhapjen e luftës,” i tha Xi Putinit, sipas deklaratës kineze.

Kremlini deklaroi se të dy liderët besojnë se nuk ka zgjidhje ushtarake për konfliktin apo për programin bërthamor të Iranit, pasi këto çështje duhet të zgjidhen vetëm përmes mjeteve politike dhe diplomatike.

“(Putin) konfirmoi gatishmërinë e Rusisë për të ndërmarrë përpjekje të mundshme ndërmjetësimi nëse është e nevojshme. Udhëheqësi kinez shprehu mbështetje për një ndërmjetësim të tillë, duke e konsideruar si një kontribut të mundshëm për uljen e tensioneve në këtë situatë jashtëzakonisht të tensionuar,” thuhet në një deklaratë të Kremlinit.

Të dyja palët ranë dakord të mbajnë kontakte të ngushta mes shërbimeve të tyre diplomatike dhe të sigurisë në ditët në vijim.