Kuzhina italiane, pasuri botërore e UNESCO-s

Kuzhina italiane është përfshirë nga UNESCO në listën e Trashëgimisë Kulturore Jomateriale.
Kryeministrja italiane Giorgia Meloni përshëndeti vendimin, duke e quajtur këtë veprim një njohje të identitetit të vendit dhe ndikimit të tij global.

“UNESCO e njohu kuzhinën italiane si një trashëgimi të njerëzimit. Ne jemi të parët në botë që marrim këtë njohje, e cila nderon atë që jemi dhe nderon identitetin tonë. Sepse për ne italianët, kuzhina nuk është vetëm ushqim, jo vetëm një koleksion recetash, është shumë më tepër: është kulturë, traditë, punë, pasuri.”

Statusi shënon përfundimin me sukses të një fushate trevjeçare nga Ministria e Bujqësisë e Italisë për të njohur mënyrën tradicionale të kultivimit, korrjes, përgatitjes dhe servirjes së ushqimit në vend.

“Kjo njohje do t’i japë sistemit italian një shtysë vendimtare drejt arritjes së objektivave të rinj. Qeveria ka besuar në këtë sfidë që nga fillimi dhe ka bërë pjesën e saj për të arritur këtë rezultat.”

Ky vendim vjen në një kohë kur vendi vazhdon të luftojë kundër abuzimeve që bëhen me produktet italiane.