Kolumbia pezullon bashkëpunimin e inteligjencës me SHBA-të

Presidenti kolumbian Gustavo Petro urdhëroi të martën forcat e sigurisë së vendit të tij, që të ndalojnë ndarjen e informacionit të inteligjencës me Shtetet e Bashkuara, derisa administrata Trump të ndalojë sulmet ndaj mjeteve të dyshuara për trafik droge në Karaibe, ndërsa marrëdhëniet mes dy vendeve dikur partnere të ngushta në luftën kundër narkotikëve po përkeqësohen.

Në një mesazh në rrjetin social X, Petro shkroi se ushtria kolumbiane duhet të ndërpresë menjëherë “komunikimet dhe marrëveshjet e tjera me agjencitë amerikane të sigurisë” derisa SHBA-të të ndalojnë sulmet ndaj skafeve të dyshuara për transport droge, të cilat kritikët i kanë krahasuar me ekzekutime pa gjyq.

Petro theksoi se “lufta kundër drogës duhet t’i nënshtrohet të drejtave të njeriut të popujve të Karaibeve.” Nuk është ende e qartë se çfarë lloj informacioni Kolumbia do të ndalojë së ndari me SHBA-të. Shtëpia e Bardhë nuk ka reaguar menjëherë ndaj deklaratave të fundit të Petros.

Sipas të dhënave të administratës Trump, të paktën 75 persona janë vrarë nga ushtria amerikane në ujërat ndërkombëtare që nga gushti. Sulmet filluan në Karaibet jugore, pranë brigjeve të Venezuelës, por së fundmi janë zhvendosur në Paqësorin lindor, ku SHBA-të kanë shënjestruar mjete pranë Meksikës.

Petro ka kërkuar që presidenti amerikan Donald Trump të hetohet për krime lufte për shkak të këtyre sulmeve, të cilat kanë prekur qytetarë nga Venezuela, Ekuadori, Kolumbia dhe Trinidad e Tobako.

Lideri i majtë ka qenë prej kohësh kritik ndaj politikave amerikane për drogën, duke akuzuar administratën Trump se ndjek fshatarët që kultivojnë kokainë, në vend që të godasë trafikantët e mëdhenj dhe rrjetet e pastrimit të parave. Të dielën, Petro tha se ishte takuar me familjen e një peshkatari kolumbian që dyshohet se ishte vrarë në një nga këto sulme.

“Ai mund të ketë transportuar peshk, ose mund të ketë transportuar kokainë, por nuk ishte dënuar me vdekje,” tha Petro gjatë një samiti mes liderëve të Amerikës Latine dhe Bashkimit Evropian të organizuar nga Kolumbia. “Nuk kishte nevojë të vritej.”

Administrata Trump e ka akuzuar Petron se është i butë ndaj trafikantëve dhe ka kritikuar vendimin e tij për të mos ekstraduar drejt SHBA-ve liderë rebelë kolumbianë të përfshirë në trafikun e drogës.

Në tetor, administrata vendosi sanksione financiare ndaj Petros dhe anëtarëve të familjes së tij, për shkak të akuzave për përfshirje në tregtinë globale të drogës.

“Petro ka lejuar që kartelet e drogës të lulëzojnë dhe ka refuzuar të ndalojë këtë aktivitet,” tha Sekretari i Thesarit, Scott Bessent, pas vendosjes së sanksioneve më 24 tetor. “Presidenti Trump po ndërmerr masa të forta për të mbrojtur vendin tonë dhe për të bërë të qartë se nuk do të tolerojmë trafikun e drogës drejt SHBA-ve.”

Tensionet e shtuara mes SHBA-ve dhe Kolumbisë po ndodhin ndërsa SHBA-të po rritin praninë e saj detare në Karaibet jugore, me tetë anije luftarake, një nëndetëse, avionë luftarakë dhe marinsa të dislokuar në rajon. Një aeroplanmbajtëse, USS Gerald Ford, pritet të mbërrijë në Karaibe këtë muaj.

Qeveria e Venezuelës e ka përshkruar këtë grumbullim ushtarak si kërcënim ndaj sovranitetit të saj, me zyrtarë që thonë se ushtria amerikane po përgatitet për sulme ndaj qeverisë së presidentit Nicolas Maduro.

Administrata Trump ka deklaruar se dislokimi ka për qëllim frenimin e trafikantëve të drogës, megjithëse Trump ka lënë të kuptohet se mund të ketë edhe sulme ndaj objektivave brenda Venezuelës, lideri i së cilës është përshkruar nga zyrtarët në Uashington si kreu i një karteli droge.

Ministri i Mbrojtjes së Venezuelës, Vladimir Padrino López, njoftoi të martën se personel ushtarak, anëtarë të milicisë civile, oficerë policie dhe organizatorë të partisë në pushtet do të mobilizohen për një stërvitje për mbrojtjen e hapësirës ajrore të vendit. Ai i dha deklaratat e tij, të transmetuara në televizionin shtetëror, pranë një sistemi raketor në një bazë ushtarake në kryeqytetin Caracas, megjithëse nuk u panë aktivitete stërvitore në pjesë të tjera të qytetit.