Franca: Italia, konkurrencë të pandershme tatimore

Kryeministri francez François Bayrou shkaktoi polemika me qeverinë italiane, pasi në një intervistë për disa televizione të Francës, kritikoi Italinë për praktika të pandershme në ekonomi, duke u bërë strehë e të pasurve të pakënaqur nga taksa progresive.

“Për fat të keq, njerëzit po largohen sepse tani ka një lloj nomadizmi tatimor, që do të thotë se taksapaguesit do të vendosen aty ku u leverdis. Italia sot po bën një konkurrencë të pandershme tatimore.”

Në një deklaratë për shtyp thuhet se Italia nuk zbaton nxitës të pajustifikuar tatimorë për të tërhequr kompani apo individë nga vendet e tjera të BE-së, por është ekonomia e qëndrueshme dhe e besueshme e vendit që është tërheqëse për ta.

Kreu i qeverisë franceze duket se u fut në këtë telash, i ndodhur përballë presionit për të mbajtur gjallë qeverinë e tij të minorancës, që rrezikon të bjerë në mocionin e votëbesimit të 8 shtatorit. Kundër qeverisë së tij pritet të votojnë nacionalistët e Tubimit Kombëtar, por edhe socialistët, të cilëve Bayrou refuzoi t’ua përmbushë kërkesën për të rritur taksat ndaj të pasurve, në vend të reduktimit të ndihmës sociale, në planin e shkurtimeve radikale të shpenzimeve për buxhetin e 2026-ës.

Presidentja e Bankës Qendrore Europiane, Christine Lagarde, duke iu referuar rrezikut të rënies së qeverisë franceze, tha se rrëzimi i çdo kabineti brenda Eurozonës cenon stabilitetin ekonomik të gjithë hapësirës.