FONDET OSE I “HEQIM”! 30 balena në rrezik nëse Kopshti Zoologjik Kanadez s’merr fondet nga qeveria

Kopshti zoologjik kanadez kërcënon të vrasë 30 balena nëse nuk merr fonde qeveritare, pasi ministri i peshkimit vendosi të bllokojë transferimin e balenave në një park argëtues në Kinë.

Marineland, një park argëtimi, kopsht zoologjik, akuarium dhe pyll prej 100 hektarësh në Ontario, Kanada, është kritikuar për mbajtjen e kafshëve në kushte të këqija.

Parku, i cili dikur mirëpriste miliona vizitorë, nuk u hap për sezonin e verës dhe ka ndërprerë veprimtarinë, në pritje të shitjes së tij. Në shkurt, një avokat i parkut tha se planifikonte të largonte kafshët e mbetura ende në vend sa më shpejt të ishte e mundur.

Por fati i balenave në veçanti është një çështje që shqetëson aktivistët, të cilët argumentojnë se cetacetë duhet të transferohen në një strehë. Megjithatë, siç vëren Guardian, ka pak mundësi të zbatueshme. Që nga viti 2019, 19 balena beluga dhe një orkë kanë ngordhur në park.

Edhe pse Marineland kishte planifikuar t’i transportonte balenat në Kinë, ministrja kanadeze e peshkimit bllokoi lejen e eksportit, duke thënë se “nuk mund të miratonte me ndërgjegje të pastër një eksport që do të përjetësonte keqtrajtimin që kanë pësuar këto beluga”.

Kompania thotë se nëse qeveria federale nuk është në gjendje të financojë parkun ose të miratojë eksportin e balenave deri më 7 tetor, Marineland do të detyrohet t’i eutanazizojë ato.