“E papranueshme”, Sekretari amerikan i Mbrojtjes bën për ujë të ftohtë gjeneralët për peshën

Sekretari i Mbrojtjes, Pete Hegseth, u tha oficerëve të lartë ushtarakë se nuk dëshiron më të shohë “gjeneralë dhe admiralë të shëndoshë” apo trupa mbipeshë në formacionet luftarake, duke theksuar nevojën për t’iu përmbajtur standardeve të rrepta të formës fizike për anëtarët e shërbimit ushtarak amerikan në mbarë botën.

“Është plotësisht e papranueshme të shohësh gjeneralë dhe admiralë të shëndoshë në korridoret e Pentagonit, që udhëheqin komanda në vend dhe në botë, është një pamje e keqe”, tha Hegseth gjatë një takimi të pazakontë me oficerë në një bazë ushtarake në Quantico, Virxhinia. “Është e keqe dhe nuk na përfaqëson.”

Hegseth përmendi pjesëmarrjen e tij personale në stërvitje fizike si shembullin e standardit që pret nga të gjithë ushtarët amerikanë.

“Gjithçka fillon me formën fizike dhe paraqitjen”, tha ai. “Nëse Sekretari i Luftës mund të bëjë rregullisht stërvitje të vështira fizike, atëherë mund ta bëjë edhe çdo anëtar i forcave tona të përbashkëta.”

“Sot, me urdhrin tim, çdo anëtar i forcës së përbashkët, në çdo gradë, është i detyruar … [të] përmbushë kërkesat për gjatësinë dhe peshën dy herë në vit, çdo vit”, shtoi Hegseth.