Del në ankand fanella e Michael Jordan

Fanella e veshur nga Michael Jordan gjatë një prej sezoneve më të famshme të karrierës së tij ka dalë në ankand dhe mund të bëhet fanella më e shtrenjtë e basketbollit e shitur ndonjëherë. Sipas raportimeve, vlera e saj mund të arrijë 10 milionë dollarë.

Fanella e bardhë, prej materiali rrjetë dhe me numrin ikonë “23” të Jordanit, u vesh nga legjenda amerikane gjatë ndeshjes së tretë të serisë së famshme të finaleve të NBA-së në vitin 1998. Ishte në fund të periudhës së tij me Chicago Bulls, e njohur si “The Last Dance”, e cila u trajtua edhe në dokumentarin e vitit 2020 nga ESPN dhe Netflix me të njëjtin titull.

Sipas Joopiter, shtëpisë online të ankandeve që po organizon shitjen, kjo është e vetmja fanellë e bardhë e veshur në një ndeshje të Finales së NBA-së 1998, e njohur publikisht dhe që është nxjerrë në shitje. Për këtë arsye, ajo konsiderohet një pjesë jashtëzakonisht e rrallë e aseteve sportive.