Coldplay anulon turneun, Chris Martin përballet me problemin e rëndë shëndetësor

Turi botëror i Coldplay ka qenë padyshim një nga evenimentet e vitit, me shfaqjet e tyre që kanë tërhequr vëmendjen e fansave të tyre dhe gjithë njerëzve, falë video-ve spektakolare që janë shpërndarë në rrjetet sociale. Aq të ndjekura e të kërkuara kanë qenë koncertet e tyre sa të bleje një biletë për t’i parë nga afër u bë diçka gati e pamundur.

Megjithatë një lajm i keq vjen për fansat e tyre, teksa bëhet me dije se vokalisti i grupit, Chris Martin po përballet me probleme shëndetësore dhe si rrjedhojë ka anuluar koncertet e ardhshme në Brazil.

Lajmin e ka konfirmuar vetë Coldplay përmes një postimi në rrjete sociale, ndërsa mësohet se Martin është prekur nga një infeksion i rëndë në mushkëri.

“Me keqardhje të thellë, ne jemi detyruar të shtyjmë shfaqjet tona të ardhshme në Rio de Zhaneiro dhe São Paulo deri në fillim të vitit 2023. Për shkak të një infeksioni të rëndë në mushkëri, Chris është vënë nën urdhrat e rreptë të mjekut për të pushuar për tre javët e ardhshme.”- shkruan grupi.

Kêshtu, ata kanë vendosur sigurisht se duhet t’i japin përparësi shëndetit të artistit, i cili ka qenë i mbingarkuar këtë periudhë, por shpresojnë se ai do të bëhet mirë pas pushimit mjekësor.