Botërori, FIFA mendon të tjera rregulla

FIFA po shqyrton ndryshime të rëndësishme në mënyrën e arbitrimit përpara Kupës së Botës së ardhshme, me synimin për të reduktuar kaosin dhe incidentet e diskutueshme gjatë situatave nga goditjet standarde.

Sipas asaj që raportohet në mediat britanike, organizmi më i lartë i futbollit botëror dëshiron t’u japë arbitrave më shumë kompetenca për të ndëshkuar mbajtjet, bllokimet dhe përplasjet në zonën e penalltisë, veçanërisht gjatë goditjeve nga këndi dhe goditjeve të lira.

Një nga opsionet që po shqyrtohet është dhënia e një goditjeje të lirë për ekipin sulmues në rastet kur një goditje nga këndi prishet nga një faull parandalues.

Ndërkohë, Bordi Ndërkombëtar i Shoqatës së Futbollit, institucioni përgjegjës për ndryshimet në rregullat e lojës, pritet ta trajtojë çështjen në plan afatgjatë.

Megjithatë, ndryshimet zyrtare nuk mund të hyjnë në fuqi përpara nisjes së turneut.

Pavarësisht kësaj, FIFA ka nisur tashmë t’u komunikojë trajnerëve të 48 kombëtareve pjesëmarrëse një interpretim më të rreptë të rregullave.

Sipas udhëzimeve të reja, arbitrat do të tregojnë tolerancë më të ulët ndaj bllokimeve mbi portierët dhe ndërhyrjeve të ashpra gjatë situatave dhe lojës së ndërprerë.

Qëllimi i FIFA-s është të shmangë polemikat dhe të garantojë më shumë rend e drejtësi në ndeshjet e Kupës së Botës, duke u dhënë arbitrave autoritet më të madh në momentet më delikate të lojës.