Bitcoin rikthehet në rritje, analistët presin një valë të re fitimesh

Bitcoin po rikthehet në qendër të vëmendjes së tregjeve pas disa javësh lëvizjesh të kufizuara. Kriptomonedha tashmë vlen 75–80 mijë dollarë, ndërsa analistët vlerësojnë se rritja e fundit është mbështetur nga disa zhvillime të rëndësishme në tregjet financiare.

Sipas Javier Molina-s, analist tregu në eToro, rikthimi i Bitcoin është ndikuar nga ndërhyrjet e Thesarit Amerikan në tregun e obligacioneve, propozimet e reja të autoriteteve amerikane për rregullimin e tregut të kriptomonedhave, mbyllja masive e basteve për rënien e çmimit të Bitcoin dhe rikthimi i parave drejt fondeve të investimit që ndjekin çmimin e tij.

Megjithatë, analistët paralajmërojnë se rritja e fundit nuk duhet parë menjëherë si fillimi i një periudhe të gjatë dhe të qëndrueshme rritjeje. Një pjesë e lëvizjes është shkaktuar nga mbyllja me humbje e pozicioneve të investitorëve që kishin vënë bast për rënien e Bitcoin. Tani tregu duhet të tregojë nëse pas kësaj rritjeje ekziston edhe një kërkesë e qëndrueshme nga investitorët.

Rezultatet e forta të Nvidia-s kanë mbështetur optimizmin për sektorin e inteligjencës artificiale. Por mbetet një pyetje e rëndësishme: a do të sjellin fitime të mjaftueshme investimet shumë të mëdha që kompanitë po bëjnë në këtë teknologji?

Nëse pritshmëritë për inteligjencën artificiale fillojnë të dobësohen, një rënie e tregut amerikan të aksioneve mund të tërheqë përkohësisht edhe Bitcoin-in drejt niveleve më të ulëta. Kjo ndodh sepse Bitcoin ende konsiderohet një investim me rrezik të lartë dhe shpesh ndikohet nga lëvizjet e tregjeve të aksioneve.

Por situata mund të ndryshojë nëse ngadalësimi ekonomik detyron bankat qendrore të ndjekin një politikë më të butë. Nëse normat reale të interesit bien dhe kushtet financiare bëhen më të favorshme, kjo mund të kthehet në një faktor pozitiv për Bitcoin-in.

Sipas Molina-s, skenari më i keq për Bitcoin-in do të ishte një kombinim i rritjes së dobët ekonomike me norma të larta interesi. Një ekonomi që ngadalësohet, interesa të larta, dollar i fortë dhe më pak para në qarkullim do të krijonin një mjedis shumë të vështirë për investimet me rrezik.

Nga ana tjetër, André Dragosch, drejtues i kërkimit për Evropën në Bituise, e cilëson Bitcoin-in si një lloj “kanarini në minierën e ekonomisë”. Me këtë krahasim, ai nënkupton se lëvizjet e Bitcoin-it mund të japin sinjale të hershme për ndryshimet në gjendjen e ekonomisë dhe të tregjeve financiare.

Sipas Dragosch, rritja e fundit është ndihmuar gjithashtu nga mbyllja e pozicioneve të investitorëve që prisnin rënien e çmimeve dhe nga rikthimi i parave të investitorëve të mëdhenj drejt fondeve të rregulluara që investojnë në kriptomonedha.

Ky rikthim i interesit nga investitorët e mëdhenj shihet si një sinjal pozitiv. Ai tregon se Bitcoin po rikthehet në vëmendjen e investitorëve si një pjesë e mundshme e portofolave të tyre afatgjata.

Megjithatë, rruga përpara mbetet e lidhur ngushtë me zhvillimet jashtë tregut të kriptomonedhave. Normat e interesit në SHBA, vendimet e Rezervës Federale, interesat e obligacioneve, fuqia e dollarit dhe zhvillimet politike e gjeopolitike do të kenë ndikim të drejtpërdrejtë te Bitcoin.

Në këtë pikë, rritja e fundit është një sinjal pozitiv, por ende nuk është provë se ka nisur një periudhë e gjatë rritjeje. Për ta konfirmuar këtë, Bitcoin duhet të ruajë nivelet e fituara së fundmi dhe flukset e parave drejt fondeve të investimit duhet të vazhdojnë.

Nëse këtyre faktorëve u shtohen norma më të ulëta interesi, më shumë para në qarkullim dhe një klimë më e favorshme për investimet me rrezik, Bitcoin mund të ketë hapësirë për një tjetër fazë të fortë rritjeje.