Putini konsolidon kontrollin mbi Rusinë, 49 veteranë të luftës në Ukrainë zgjidhen në parlament

Partia në pushtet “Rusia e Bashkuar” e Valdimir Putin ka korrur një fitore të thellë në zgjedhjet parlamentare që u kritikuan gjerësisht nga Perëndimi, duke siguruar një rekord prej 355 vendesh në Dumën shtetërore prej 450 vendesh.

Ky rezultat përforcon edhe më tej pushtetin e presidentit Vladimir Putin dhe i jep partisë pro-Kremlinit një super-shumicë më të madhe se ajo e vitit 2016. Në parlamentin e ri pritet të përfshihen të paktën 49 deputetë që kanë marrë pjesë drejtpërdrejt në luftën kundër Ukrainës, çka sekretari i përgjithshëm i partisë, Vladimir Yakushev, e quajti një kontribut të konsiderueshëm.

Procesi zgjedhor është përballur me reagime të ashpra ndërkombëtare. Qeveritë perëndimore i dënuan votimet e mbajtura në territoret e pushtuara të Ukrainës duke i cilësuar si një “farsë”, ndërsa shefja e diplomacisë së BE-së, Kaja Kallas, deklaroi se Kremlini heshti opozitën, përjashtoi vëzhguesit ndërkombëtarë dhe se nga demokracia ruse ka mbetur vetëm një fasadë.

Këto zgjedhje po zhvillohen në një moment delikat, mes spekulimeve se Putin mund të njoftojë një fushatë të re mobilizimi këtë vjeshtë për të rekrutuar deri në 300 mijë trupa shtesë, me synimin për t’i dhënë shtytje fushatës ushtarake që ka ngecur në lindje të Ukrainës.

Ndërkohë që Rusia ka intensifikuar sulmet ajrore në qytetet ukrainase dhe përpjekjet për të marrë rajonin e Donbasit, forcat e Kievit po përgjigjen me kundërofensiva lokale dhe sulme me rreze të gjatë ndaj infrastrukturës energjetike ruse. Presidenti ukrainas Volodymyr Zelenskyy paralajmëroi se Rusia po sinjalizon gatishmëri për të zgjeruar luftën dhe i kërkoi komunitetit ndërkombëtar të vazhdojë presionin mbi agresorin për t’i dhënë fund konfliktit.