Vatrat e zjarrit në Portugali, mobilizohen rreth 800 zjarrfikës për të shuar flakët

Rreth 800 zjarrfikës u mobilizuan këtë mëngjes për të shuar një zjarr në shkurre që ka shpërthyer që nga e marta në Portugalinë veriore, sipas raportit të fundit nga agjencia e mbrojtjes civile .

“Perimetri i zjarrit është vënë nën kontroll me rreth 80%, por zjarri mbeti aktiv pak para mesditës.”, tha një zëdhënës i Agjencisë Kombëtare të Mbrojtjes Civile.

Sipas raportimeve, forcat e vendosura në vendngjarje u përforcuan nga nata e së mërkurës deri të enjten. Vështirësia kryesore sot lidhet me kushtet e dukshmërisë, të cilat e ndërlikojnë aktivizimin e mjeteve ajrore. Zjarri shpërtheu të martën në Valpassos (veri) dhe më pas u përhap në komunën fqinje të Mirandela-s.

Zjarri la pesë persona të plagosur lehtë, përfshirë tre zjarrfikës dhe një oficer policie, sipas mbrojtjes civile. Në anën tjetër të kufirit, një zjarr i madh po digjej sot në Fermocel, në Spanjën perëndimore, një distancë të shkurtër nga kufiri me Portugalinë. Portugalia, e cila është prekur shumë më pak në javët e fundit krahasuar me vendet e tjera evropiane, përjetoi zjarret e para të mëdha të verës një muaj më parë mes një vale të nxehti.