Fauci refuzon t’u përgjigjet pyetjeve në Senatin amerikan, thirret në Amendamentin e Pestë

Anthony Fauci, një nga figurat kryesore në menaxhimin e pandemisë së Covid-19 në Shtetet e Bashkuara, u paraqit këtë të mërkurë para një komisioni të Senatit amerikan, por refuzoi t’u përgjigjej shumicës së pyetjeve, duke iu referuar Amendamentit të Pestë të Kushtetutës së SHBA-së.

Sipas BBC-së, seanca u shoqërua me momente tensioni, veçanërisht kur një nga avokatët e Fauci-t u përpoq të kundërshtonte pyetjet e vazhdueshme të senatorit republikan Rand Paul. Ky i fundit kërkoi dhe arriti që avokati të largohej nga salla.

Fauci ka pranuar se në fazat e hershme të pandemisë u mor në konsideratë edhe hipoteza e rrjedhjes nga laboratori, por më pas arriti në përfundimin se skenari më i mundshëm ishte kalimi natyror i virusit nga kafshët te njerëzit.

Ndërkohë, Sekretari amerikan i Shëndetësisë, Robert F. Kennedy Jr., deklaroi për Fox News se autoritetet kishin punuar për tetë muaj për të rikuperuar shënimet personale të Fauci-t nga serverë të ndryshëm qeveritarë.

Fauci doli në pension në vitin 2022, pasi drejtoi për dekada Institutin Kombëtar të Alergjive dhe Sëmundjeve Infektive. Gjatë dhe pas pandemisë ai u përball me kërcënime me vdekje, si edhe me kritika të forta nga republikanët për mbështetjen e masave si mbajtja e detyrueshme e maskave dhe kufizimet kundër Covid-19.

Përpara përfundimit të mandatit të tij, ish-presidenti Joe Biden i dha Fauci-t një falje parandaluese, me synimin për ta mbrojtur nga ndjekje të mundshme penale lidhur me vendimet e marra gjatë pandemisë.