Dakota Johnson transformohet në Marilyn Monroe

Dakota Johnson do të marrë një nga rolet më sfiduese të karrierës së saj, duke interpretuar ikonën e Hollywood-it, Marilyn Monroe, në filmin e ri “Flesh Impact“, me regji nga Maggie Gyllenhaal.

Projekti u prezantua më 27 korrik nga kompania Genesis, e cila po bashkëpunon me regjisoren për realizimin e filmit në kuadër të 100-vjetorit të lindjes së Marilyn Monroe. Filmi synon të sjellë një këndvështrim të ri mbi jetën e aktores legjendare, duke eksploruar jo vetëm figurën publike që njohu e gjithë bota, por edhe anën e saj më personale.

Sipas njoftimit zyrtar, Dakota Johnson do të interpretojë Marilyn Monroe në kulmin e famës së saj, ndërsa fituesja e Oscar-it Ellen Burstyn do të luajë një version tjetër të aktores, të përshkruar si “Marilyn që bota nuk e njohu kurrë”. Fotot e para të publikuara nga produksioni kanë tërhequr menjëherë vëmendjen, pasi Johnson shfaq një ngjashmëri të habitshme me yllin e ndjerë.

Maggie Gyllenhaal ka treguar se është ndjerë prej kohësh e intriguar nga figura e Monroe dhe se nuk e mendoi dy herë kur iu propozua ky projekt.

“Gjithmonë kam qenë e magjepsur nga Marilyn Monroe. Kur më propozuan të krijonim një projekt për 100-vjetorin e lindjes së saj, e dija se doja të isha pjesë e kësaj historie,” tha regjisorja.

Ajo shtoi se “Flesh Impact” do ta prezantojë Marilyn-in që publiku njeh, por përmes një këndvështrimi modern që synon të rishikojë historinë e saj. Në një intervistë për Vanity Fair, Gyllenhaal pranoi se në fillim kishte hezituar ta merrte përsipër një projekt kaq të rëndësishëm, por ishte pikërisht mënyra e veçantë e aktrimit të Monroe që e bindi.

“E gjej interpretimin e saj magjepsës, spontan dhe plot jetë, por njëkohësisht thellësisht prekës. Shpesh kam menduar se si do të kishte evoluar si aktore nëse do të kishte jetuar edhe 60 vite të tjera,” u shpreh ajo.

Përveç Dakota Johnson dhe Ellen Burstyn, në kast bëjnë pjesë edhe Sepideh Moafi dhe Peter Sarsgaard. Filmi pritet të ketë premierën botërore në Festivalin e Filmit në Venecia në shtator 2026.