Shtetet e Gjirit në një valë huamarrjeje prej 10 miliardë dollarësh, gjatë kohës së luftës!

Monarkitë e Gjirit kanë siguruar në mënyrë diskrete pothuajse 10 miliardë dollarë përmes shitjeve private të obligacioneve këtë muaj, në huamarrjen e tyre të parë ndërkombëtare që nga lufta me Iranin, e cila i dha një goditje të madhe ekonomive të tyre.

Abu Dhabi ka shitur 4.5 miliardë dollarë, Katari 3 miliardë dollarë dhe Kuvajti 2 miliardë dollarë në vendosje private të obligacioneve në dollarë amerikanë që nga fillimi i prillit, duke shmangur tregjet publike ku zakonisht emetonin borxh para luftës, por ku kostot e huamarrjes mund të jenë më të pasigurta.

“Abu Dhabi, kryeqyteti i Emirateve të Bashkuara Arabe, po mbledh pak para shtesë për çdo rast”, tha një bankier i njohur me shitjet e borxhit të tij.

Qeveritë e Abu Dhabit, Katarit dhe Kuvajtit nuk iu përgjigjën kërkesave për koment.

Shtetet e Gjirit janë ndër më të pasurat në botë, me fondet sovrane dhe investitorët shtetërorë që kontrollojnë kolektivisht mbi 3.5 trilionë dollarë asete. Megjithatë, ato janë bërë huamarrës të rregullt në tregjet e borxhit për të financuar plane të mëdha investimi, ndërsa përpiqen të diversifikojnë ekonomitë e tyre përtej naftës dhe gazit.

Lufta me Iranin po u shkakton një goditje të konsiderueshme ekonomive të tyre: Katari është detyruar të pezullojë eksportet e gazit natyror të lëngshëm, ndërsa rrjedhat e naftës nga Kuvajti dhe Emiratet e Bashkuara Arabe janë reduktuar ndjeshëm, duke goditur bazën kryesore të ekonomive të tyre.

“Edhe nëse lufta përfundon shpejt, ne presim që të gjashtë shtetet e Gjirit të regjistrojnë rënie të PBB-së këtë vit prej 5–10 për qind,” thanë analistët e Capital Economics.

Edhe pse kjo valë marrëveshjesh këtë muaj është jashtëzakonisht e madhe, vendosjet private, shitjet direkte të obligacioneve te grupe të vogla investitorësh, po rriten në përgjithësi në borxhin sovran, edhe pse ato ofrojnë një bazë më pak të larmishme investitorësh dhe obligacionet zakonisht janë më pak likuide.

Menaxherë të mëdhenj globalë të aseteve si Pimco janë gjithnjë e më të gatshëm të blejnë obligacione ku kushtet dhe çmimet negociohen në mënyrë bilaterale, ndërsa qeveritë fitojnë më shumë siguri mbi kostot e huamarrjes duke punuar me grupe më të vogla investitorësh.

“Ne e shohim rajonin si një pjesë thelbësore të tregjeve tona në zhvillim dhe të aktivitetit tonë në kreditë private, dhe mbetemi të gatshëm të vendosim kapital shtesë për të mbështetur sovranët e Gjirit ndërsa nevojat e tyre për financim evoluojnë,” shtoi ai. Ai nuk pranoi të thotë nëse Pimco ka marrë pjesë në marrëveshjet e fundit në rajon.

Abu Dhabi shiti 2 miliardë dollarë borxh me një kupon prej 4.6 për qind në një marrëveshje të organizuar nga Goldman Sachs të hënën, megjithatë Goldman nuk pranoi të komentojë.

Emirati gjithashtu siguroi 2.5 miliardë dollarë javën e kaluar përmes vendosjeve private të obligacioneve ekzistuese, në marrëveshje të rregulluara nga Standard Chartered.

HSBC ndihmoi Kuvajtin të shesë 2 miliardë dollarë obligacione këtë javë me një kupon prej 4.8 për qind, ashtu si edhe vendosja e JPMorgan për Katarin. Obligacionet e Katarit u listuan këtë javë në tregun e Londrës, një praktikë tipike për ta bërë më të lehtë tregtimin dhe vlerësimin e vendosjeve private.

Marrëveshjet e Abu Dhabit kanë rritur huamarrjen e tij ndërkombëtare me obligacione në 8 miliardë dollarë deri tani këtë vit, krahasuar me pak më shumë se 3 miliardë dollarë në vitin 2025, kur emirati shiti obligacione me disa nga primet më të ulëta ndonjëherë mbi obligacionet e thesarit amerikan për borxhin në dollarë të tregjeve në zhvillim.

Emirati emetoi 3.5 miliardë dollarë borxh në dollarë në janar dhe shkurt, me shitjet e fundit vetëm disa ditë para se SHBA dhe Izraeli të nisnin sulmet ndaj Iranit.

Si shenjë e nervozizmit të investitorëve për goditjen ndaj këtyre ekonomive, lufta rriti koston e sigurimit kundër mospagimit për borxhin pesëvjeçar të Abu Dhabit deri në rreth 0.55 pikë përqindjeje muajin e kaluar, krahasuar me 0.3 pikë përqindjeje ose më pak para konfliktit, por ajo ka rënë në rreth 0.4 pikë përqindjeje që nga armëpushimi.

Abu Dhabi përditësoi dokumentacionin për obligacionet e tij këtë muaj, duke paralajmëruar se “nuk ka përfunduar ende një vlerësim të dëmit të menjëhershëm apo afatgjatë në ekonominë ose infrastrukturën e tij” nga lufta.

Pak para konfliktit, JP Morgan kishte sinjalizuar se borxhet e Emirateve të Bashkuara Arabe dhe anëtarëve të saj do të përmirësoheshin në statusin e tregjeve të zhvilluara në indekset e obligacioneve që mirëmban banka. Katari dhe Kuvajti u përmirësuan vitin e kaluar.

Shitja private e borxhit nga Kuvajti, që sipas bankierëve synonte të forconte një rezervë për raste emergjente, është veçanërisht e rëndësishme pasi vendi u rikthye në tregjet globale të obligacioneve vetëm vitin e kaluar me rreth 11 miliardë dollarë emetime, pas një mungese tetëvjeçare.

Arabia Saudite, huamarrësi më i madh sovran në Gjirin Persik, ende nuk ka hyrë në tregjet private në ndonjë marrëveshje të zbuluar pas luftës. Mbretëria kishte shitur tashmë 13.5 miliardë dollarë obligacione në janar dhe shkurt para fillimit të luftës, krahasuar me 53 miliardë dollarë për të gjithë vitin e kaluar.

Ndërkohë, bankat shtetërore të vendeve të Gjirit kanë mbledhur qindra miliona dollarë në javët e fundit përmes vendosjeve private të obligacioneve dhe formave të tjera të borxhit afatshkurtër, ndonjëherë përmes degëve në Azi.