2 javë nëntokë, shpëtohet për mrekulli minatori

Zhytësit e ushtrisë meksikane kanë shpëtuar një minator nga një tunel nëntokësor i përmbytur dy javë pasi ai u bllokua. Francisco Zapata Nájera, 42 vjeç, mbeti i bllokuar 300 metra nën tokë pasi një argjinaturë u shemb në minierën e arit në qytetin verior meksikan të Sinaloas.

Videoja e shpëtimit e tregon atë duke qëndruar në ujë deri në bel, duke u thënë shpëtimtarëve të tij se nuk e humbi kurrë besimin gjatë kësaj përvoje. Kërkimi vazhdon për një minator tjetër që është ende i zhdukur.

José Alejandro Cástulo u shpëtua pas pesë ditësh nën tokë, dhe një minator tjetër vdiq, por ekipit të shpëtimit iu deshën plot 13 ditë për të gjetur Francisco Zapatën.

Pas më shumë se 300 orësh kërkimi, zhytësit më në fund vunë re ndezjen e dritës së pishtarit të minatorit, të cilën Zapata e kishte ndezur dhe fikur për t’i njoftuar për vendndodhjen e tij.

“Si jeni, si jeni?” pyetën shpëtimtarët ndërsa arritën tek ai. Pasi u identifikuan si zhytës të specializuar ushtarakë, i thanë minatorit se “drita e pishtarit na ndihmoi shumë”.

“Na udhëhoqi”, shtoi njëri nga zhytësit. “Nuk e humba besimin, nuk e humba besimin”, tha minatori. Ndërsa Zapata duket dukshëm i lehtësuar në pamjet filmike, përvoja e tij e vështirë nuk kishte mbaruar ende.

Për shkak të përmbytjeve në tunelin që të çonte në vendndodhjen e tij, zhytësit nuk mundën ta nxirrnin menjëherë. Në vend të kësaj, e lanë pas me ujë, ushqim, dhe një premtim për t’u kthyer së shpejti.

Pas 20 orësh të tjera gjatë të cilave ekipet e shpëtimit përdorën pompa për të ulur nivelin e ujit në tunelet e përmbytura, Zapata më në fund mundi të nxirrej në sipërfaqe.

I mbështjellë me një batanije termike dhe i ulur në një karrocë elektrike, ai doli nga miniera të mërkurën dhe u dërgua me helikopter në spital, ku mundi të ribashkohej me familjen e tij.

Mjekët thanë se ai ishte i dobët, por në gjendje të qëndrueshme dhe do të merrte trajtimin e nevojshëm.

Presidentja meksikane Claudia Sheinbaum vlerësoi ushtrinë meksikane dhe besimin dhe qëndrueshmërinë e Zapateros, të cilat, sipas saj, e kishin bërë të mundur “shpëtimin mahnitës”.