Tensionet globale trazojnë futbollin

Kupa e Botës 2026 duhet të shërbejë si një mundësi për të “ndërtuar ura” në një kohë të tensionuar gjeopolitike. Këtë synon të realizojë FIFA dhe tre vendet organizatore në turneun që do të nisë më 11 qershor 2026 dhe do të organizohet nga Shtetet e Bashkuara, Kanadaja dhe Meksika, me shumicën e ndeshjeve që do të zhvillohen në territorin amerikan.

“Të gjithë e dimë situatën gjeopolitike në të gjithë botën dhe e kemi thënë shumë herë: FIFA, ose futbolli, sigurisht që nuk mund t’i zgjidhë konfliktet gjeopolitike në të gjithë botën. Ajo që mund të bëjmë dhe që do të bëjmë është të përdorim futbollin dhe Kupën e Botës për të bashkuar njerëzit, për të ndërtuar ura, për të nxitur mirëkuptimin dhe paqen midis njerëzve nga e gjithë bota. Kupa e Botës është një rast dhe mundësi unike që të gjithë në botë të bashkohen në një atmosferë të gëzueshme dhe paqësore. Prioriteti ynë dhe i tre organizatorëve, Kanadasë, Meksikës dhe Shteteve të Bashkuara, është të organizojmë Kupën e Botës me 48 ekipet që janë kualifikuar për Kupën e Botës. Dhe këto ekipe dhe tifozët e tyre do të mirëpriten për një Kupë Bote të sigurt”, shprehet Gianni Infantino, president i FIFA-s.

Në reagimin e tyre, Federata e Futbollit e Iranit kërkoi garanci të plota sigurie, duke paralajmëruar se, në të kundërt, Shtetet e Bashkuara nuk duhet të presin turneun. Sipas shortit, Irani do të luajë të gjitha sfidat e grupit G në stadiumet amerikane, kundër Zelandës së Re, Belgjikës dhe Egjiptit. Autoritetet në Teheran i kanë kërkuar FIFA-s që ndeshjet e Iranit të zhvendosen në Meksikë, me presidenten Claudia Sheinbaum që ka deklaruar se vendi është i gatshëm të presë këto ndeshje nëse merret një vendim i tillë.