Udhëheqësja e Venezuelës zëvendëson komandantët e lartë ushtarakë

Udhëheqësja e përkohshme e Venezuelës, Delcy Rodríguez, ka zëvendësuar komandantët e lartë ushtarakë të vendit një ditë pas emërimit të një ministri të ri të mbrojtjes.

Duke shpallur vendimin të enjten, Rodríguez tha se emërimet e reja do të garantojnë “sovranitetin, paqen, stabilitetin dhe integritetin territorial” të Venezuelës.

Që atëherë Rodríguez është distancuar nga qeverisja e paraardhësit të saj dhe ka bashkëpunuar ngushtë me Uashingtonin, pasi dy vendet i rivendosën marrëdhëniet diplomatike në fillim të marsit.

Ndër emërimet e reja ushtarake, Rodríguez tha se Dilio Alejandro Agüero Montes do të jetë komandant i marinës, Royman Antonio Hernández Briceño komandant i forcave ajrore, dhe Rubén Darío Belzares Escobar komandant i ushtrisë.

Të mërkurën, Rodríguez prezantoi një riformatim të kabinetit të saj të përkohshëm, që përfshinte shkarkimin e aleatit të Maduros, Vladimir Padrino López, nga posti i ministrit të mbrojtjes. Në një postim në Telegram, ajo njoftoi Gustavo González López si ministër të ri të mbrojtjes, duke falënderuar Padrinon për shërbimin dhe “besnikërinë ndaj vendit”.

Organizata e të drejtave të njeriut Provea e cilësoi emërimin e ri si një “riciklim të pandëshkueshmërisë”.

Padrino kishte shërbyer si ministër i mbrojtjes për 12 vite dhe ishte një nga mbështetësit më të fortë të Maduros. Duke reaguar ndaj lajmit se ishte zëvendësuar, ai tha se kishte qenë “nderi më i madh i jetës sime të shërbej vendin si ushtar dhe të mbroj paqen dhe unitetin kombëtar gjatë gjithë këtyre viteve”.

Ai gjithashtu uroi González López-in për emërimin e ri, duke kujtuar se e njihnin njëri-tjetrin që nga fillimet e karrierës dhe ishte i bindur se forcat e armatosura do të “dalin më të forta” nën udhëheqjen e tij.

González López kishte qenë drejtues i shërbimit të inteligjencës së Venezuelës (Sebin) gjatë qeverisjes së Maduros në dy periudha, midis viteve 2014–2018 dhe 2019–2024.

Në një intervistë për BBC Mundo, drejtoresha e divizionit për Amerikën në Human Rights Watch, Juanita Goebertus, tha se emërimi i tij si ministër i mbrojtjes “do të thotë mbajtje e strukturës represive të paprekur dhe shpërblim për dikë që duhet të hetohet për shkelje shumë serioze të të drejtave të njeriut, përfshirë tortura dhe arrestime arbitrare”.

Në vitin 2015, presidenti amerikan i asaj kohe, Barack Obama, e sanksionoi González López, duke e akuzuar se ishte “përgjegjës ose bashkëpunëtor në akte të dhunës ose sjellje që përbëjnë abuzim serioz dhe shkelje të të drejtave të njeriut”.

Ekipi i Obamës specifikoi rolin e tij si drejtor i Sebin-it si “rol të rëndësishëm në veprimet represive kundër popullsisë civile gjatë protestave në Venezuelë”, duke shtuar se personeli i inteligjencës së vendit “kreu qindra hyrje të detyruara dhe arrestime jashtëligjore”.

Në shpalljen e saj për González López-in si ministër të ri të mbrojtjes, Rodríguez nuk shfaqi asnjë dyshim mbi integritetin e tij për rolin, duke shprehur përkundrazi besimin e saj në udhëheqjen e tij.