Ish-kryeministri i Gjeorgjisë dënohet me burg për pastrim parash

Ish-kryeministri i Gjeorgjisë, Irakli Garibashvili, u dënua këtë të hënë me pesë vite burg me akuzën e pastrimit të parave. Sipas zyrës së prokurorisë, ky vendim vjen pas një kontrolli në banesën e tij ku u gjetën dhe u sekuestruan 6.5 milionë dollarë.

Garibashvili, i cili ka shërbyer në dy mandate si kryeministër, pranoi se kishte përfituar të ardhura të paligjshme gjatë viteve të fundit dhe arriti një marrëveshje me drejtësinë për të kufizuar kohën e qëndrimit në qeli.

Analistët mendojnë se burgosja e tij dhe e zyrtarëve të tjerë të lartë mund të jetë shenjë e luftës së brendshme për pushtet, sidomos pasi disa drejtues të partisë janë goditur nga sanksionet perëndimore.

Gjeorgjia ndodhet në një krizë të thellë politike që nga zgjedhjet e tetorit, të cilat opozita i quan të vjedhura. Ndërsa qeveria thotë se po lufton korrupsionin, kritikët dhe vëzhguesit ndërkombëtarë akuzojnë pushtetin për goditje ndaj shoqërisë civile dhe largim nga rruga e anëtarësimit në Bashkimin Evropian.

Gjatë viteve të fundit, autoritetet në Gjeorgji kanë burgosur disa figura të rëndësishme pro-evropiane, duke shtuar dyshimet se vendi po rrëshqet drejt ndikimit të Moskës.