Meta do të ndërtojë qendrën e saj më të madhe të të dhënave në Luiziana për 10 miliardë dollarë

Kompania amerikane e teknologjisë Meta njoftoi se do të ndërtojë qendrën e saj më të madhe të të dhënave në shtetin jugor të SHBA-ve të Luizianës dhe pritet që për këtë projekt, me vlerë 10 miliardë dollarë, të punësohen 500 operativë dhe 5000 kontraktorë të përkohshëm ndërtimi.

Guvernatori republikan i Luizianës, Jeff Landry, e konsideron ndërtimin e shpallur si një lajm të shkëlqyeshëm për pjesën më pak të zhvilluar ekonomikisht të SHBA-së, ndërsa disa grupe mjedisore janë të shqetësuara se qendra e re e të dhënave do të mbështetet në lëndët djegëse fosile, shkruan AP.

Meta planifikon të investojë 200 milionë dollarë në përmirësimin e infrastrukturës rrugore dhe ujore të Luizianës Verilindore për të kompensuar përdorimin e lartë të pritur të ujit dhe objekti prej 370,000 metrash katrorë pritet të hapet në vitin 2030.

Luiziana po ofron lehtësime tatimore dhe stimuj të tjerë për të tërhequr firma të mëdha teknologjike që kërkojnë vendndodhje për qendrat e të dhënave me energji intensive të nevojshme për zhvillimin e inteligjencës artificiale (AI).

Departamenti i Tregtisë i Shteteve të Bashkuara të Amerikës beson se nuk ka qendra të mjaftueshme të të dhënave në vend për të përmbushur kërkesën në rritje për inteligjencë artificiale, pasi kërkesa për objekte të tilla pritet të rritet me nëntë për qind çdo vit deri në vitin 2030.

Kompania fillestare xAI e Elon Musk njofton gjithashtu investime të mëtejshme në jug të Shteteve të Bashkuara të Amerikës, pasi do të zgjerojë projektin e saj të superkompjuterëve në shtetin e Tenesit, shton agjencia amerikane./