Kape radion!

Kukullat dhe skulpturat e drurit ‘djegin’ Valencian, mbyllet festivali i Fallas

20/03/2024

Qindra fishekzjarre dhe skulptura të ngjashme me kukullat “Fallas” që digjeshin mbyllën të martën në mbrëmje festivalin spanjoll në qytetin e Valencias.

Një trashëgimi jomateriale e njerëzimit nga UNESCO, kjo festë simbolizon largimin e dimrit dhe përshëndet ardhjen e pranverës me monumente të mëdha që përfaqësojnë qenie reale dhe joreale, që qëndrojnë për disa ditë në rrugë përpara se të digjen në fund të festivalit.

Gjatë këtyre ditëve, lagjet gjallërohen nga muzika, fishekzjarrët dhe po, ka me shumicë alkool.

Festivali mendohet të ketë origjinën në shekullin e 19-të, kur marangozët e qytetit grumbullonin drutë e mbetur nga punishtet për t’i djegur në ditën e Shën Jozefit, shenjtit të tyre mbrojtës.

Me kalimin e kohës, këto ndërtime morën forma më komplekse, derisa u bënë një shfaqje e madhe e artit të rrugës. Artistët vendas u shfaqën me krijime bazuar në tema specifike, shpesh duke komentuar çështjet aktuale sociale dhe politike. Nëse shëtisni në rrugët e Valencias gjatë ditëve të festivalit, do të haseni statuja me mesazhe për çështje të diskutueshme ose që parodizojnë politikanë të njohur.

Written by: Sasha Ndreka