5.1 mln £ nga fjalimet dhe takime sekrete, “Dosjet Boris” shokojnë Londrën 2 min lexim – Publikuar 17:41, 9 Shtator 2025

Një sërë dokumentesh të rrjedhura nga zyra private e Boris Johnson ka ekspozuar mënyrën se si ish-kryeministri britanik ka përfituar nga lidhjet dhe ndikimi i krijuar gjatë kohës në pushtet, duke ngritur dyshime për shkelje të rregullave të lobimit dhe etikës.

Të ashtuquajturat “Dosjet Boris” përmbajnë mbi 1 800 emaile, kontrata, fatura, fjalime dhe dokumente të tjera, që zbulojnë funksionimin e kompanisë së themeluar nga Johnson pas largimit nga Downing Street në shtator 2022.

Zbulimet kryesore

Johnson i ka shkruar një zyrtari të lartë saudit, duke kërkuar ta ndihmonte për të prezantuar një projekt biznesi te princi Mohamed bin Salman. Ish-kryeministri ka marrë mbi 200 mijë £ nga një fond i dyshimtë pas një takimi me presidentin venezuelian Nicolás Maduro, ndonëse kishte deklaruar të kundërtën.

Ai ka zhvilluar një takim të fshehtë me miliarderin Peter Thiel, themelues i kompanisë së të dhënave Palantir, para se kjo të fitonte kontratë për menaxhimin e të dhënave të NHS (Shërbimi Shëndetësor Kombëtar në Mbretërinë e Bashkuar).

Në shkelje të rregullave të pandemisë, Johnson ka organizuar një darkë luksoze me një lord konservator që kishte financuar rinovimin e apartamentit të tij në Downing Street, vetëm një ditë pas nisjes së karantinës së dytë kombëtare.

Fitimet e mëdha nga fjalimet

Sipas dokumenteve, nga tetori 2022 deri në maj 2024, Johnson ka fituar rreth 5.1 milionë £ për 34 fjalime në mbarë botën. Përveç pagesave të majme, ai ka përfituar fluturime dhe akomodim në hotele me 5 yje për vete dhe stafin.

Skema e subvencioneve

Dosjet hedhin hije dyshimi mbi përdorimin e skemës qeveritare “Public Duty Costs Allowance” (PDCA) – një pagesë vjetore për ish-kryeministrat, posaçërisht për detyra publike. Johnson ka përfituar 182 mijë £ nga kjo skemë, por dokumentet tregojnë se zyra e tij i ka përdorur këto fonde për të menaxhuar aktivitete tregtare dhe marrëveshje private.

Reagimi i Johnson

I pyetur nga The Guardian, Johnson i ka hedhur poshtë akuzat: Kjo histori është budallallëk! PDCA është përdorur plotësisht sipas rregullave.

Skandali po krahasohet me aferën e “Greensill Capital” që përfshiu David Cameronin, ndërsa presioni ndaj Johnson pritet të rritet për të shpjeguar lidhjet e tij të fundit me qeveri të huaja.