280 mijë doza të vaksinës kundër gripit në qendra shëndetësore, mjekët thirrje qytetarëve: Vaksinohuni

Rreth 280 mijë doza të vaksinës antigrip janë shpërndarë tashmë në të gjitha qendrat shëndetësore nëpër vend, në prag të nisjes së sezonit të virozave.

Nëpërmjet një njoftimi në faqen zyrtare të Ministrisë së Shëndetësisë, mjekët bëjnë thirrje për vaksinim të gjerë, duke theksuar rëndësinë e mbrojtjes personale dhe të familjes nga gripi.

“Me fillimin e sezonit të vjeshtës, është e domosdoshme që qytetarët, veçanërisht ata në moshën 50-60 vjeç me sëmundje kronike apo probleme të zemrës, të kryejnë vaksinimin. Një prioritet kryesor mbetet personeli mjekësor, që ka rolin e rëndësishëm në shërbimin ndaj pacientëve”, shpjegon mjekja.

Po ashtu, u bëhet apel edhe prindërve që të vaksinojnë fëmijët e tyre, sidomos ata që hyjnë për herë të parë në ambientet e komunitetit.