Zjarret në Francë ‘zbulojnë’ rreth 400 predha të Luftës së Dytë Botërore

Zjarret e mëdha që përfshinë jugun e Francës kanë zbuluar një depo me rreth 400 predha dhe municione të vjetra në fshatin Le Porge, kanë bërë të ditur autoritetet lokale.

Gjatë zjarrit u dëgjuan shumë shpërthime, të cilat fillimisht u menduan se vinin nga bombolat e gazit. Më vonë u konfirmua se ato mund të kenë qenë municione të mbetura nga Lufta e Dytë Botërore, të cilat shpërthyen si pasojë e temperaturave të larta.

Pas operacioneve të çminimit, shumica e banorëve janë lejuar të kthehen në shtëpitë e tyre. Megjithatë, disa zona vazhdojnë të mbeten të mbyllura për arsye sigurie, përfshirë hyrjen drejt oqeanit, një kamping dhe fshatin La Jenny.

Autoritetet thanë se municionet e zbuluara ishin të prodhimit gjerman dhe francez dhe përfshinin predha mortajash dhe predha antitank. Sipas kryebashkiakut, depoja e municioneve ishte e varrosur nën tokë dhe autoritetet lokale nuk kishin dijeni për ekzistencën e saj.

Zjarri në rajonin Gironde, i cili zgjati rreth 10 ditë, tashmë është vënë nën kontroll. Ai shkatërroi më shumë se 180 shtëpi, ndërsa banorët po përpiqen të rikuperojnë çfarë ka mbetur nga pronat e tyre.

Kryeministri francez Sebastien Lecornu falënderoi zjarrfikësit për punën e tyre dhe deklaroi se Franca ka hyrë në një fazë të re të menaxhimit të situatës, me të evakuuarit që po kthehen gradualisht në banesat e tyre.

Gjatë dy javëve të fundit, zjarret kanë përfshirë disa vende të Evropës, veçanërisht Francën dhe Spanjën, duke detyruar evakuimin e mbi 330 mijë personave. Vetëm në jugperëndim të Francës janë djegur rreth 42 mijë hektarë pyje, në një nga zjarret më të mëdha që ka përjetuar vendi që nga Lufta e Dytë Botërore.