Trump surprizon NATO-n, premton 5 mijë trupa për Poloninë

Presidenti amerikan Donald Trump, i habiti aleatët e NATO-s duke u zotuar të dërgojë 5,000 trupa shtesë në Poloni, vetëm disa orë para se Sekretari i Shtetit Marco Rubio të takohej me ministrat e aleancës në Suedi të premten, mes përçarjeve të thella mbi luftën e Iranit.

Trump, në një postim në Truth Social, përmendi marrëdhënien e tij me presidentin nacionalist konservator të Polonisë, Karol Naërocki, si arsyen e vendimit të tij për të dërguar trupa shtesë.

Ishte një kthesë e habitshme pas javësh në të cilat Trump kritikoi ashpër anëtarët e NATO-s për mosbërjen më shumë për të ndihmuar fushatën ushtarake SHBA-Izrael.

Para se të nisej për një takim të ministrave të jashtëm të NATO-s në qytetin suedez të Helsingborgut, sekretari i shtetit Marko Rubio tha se Trump ishte “shumë i zhgënjyer” nga anëtarët e aleancës që nuk kishin lejuar SHBA-në të përdorte bazat në territorin e tyre për luftën, duke veçuar Spanjën në veçanti.

“Keni vende si Spanja që i mohojnë SHBA-së përdorimin e këtyre bazave – atëherë pse jeni në NATO? Kjo është një pyetje shumë e drejtë. Për të qenë të drejtë, vendet e tjera në NATO kanë qenë shumë të dobishme. Por ne duhet ta diskutojmë këtë”, tha Rubio.

Zyrtarët e NATO-s kanë theksuar se SHBA-të nuk i kanë kërkuar aleancës me 32 anëtarë të marrë pjesë në luftën e Iranit, por shumë anëtarë kanë respektuar angazhimet për të lejuar forcat amerikane të përdorin hapësirën ajrore dhe bazat e tyre në territorin e tyre.

Në takimin në Helsingborg, ministrat evropianë pritet të përpiqen të qetësojnë SHBA-në duke theksuar se janë të gatshëm të ndihmojnë me lirinë e lundrimit në Ngushticën e Hormuzit kur kushtet ta lejojnë dhe të marrin më shumë përgjegjësi për sigurinë evropiane.

Shtetet e Bashkuara kanë thënë gjithashtu se një vendosje e planifikuar e raketave Tomahaëk me rreze të gjatë veprimi në Gjermani nuk do të vazhdojë më.